"ჩემი ქმარი "ფეისბუქზე" ქალის სახელით კაცებს წერილებს სწერს"
ისეთ გაურკვევლობაში ვარ, რა დავწერო, არ ვიცი. ვერც ის მოვიფიქრე, ვის შეიძლება მივმართო, რომ ჭკუა დამარიგოს. ერთადერთი თქვენ გამახსენდით. ამ შემთხვევაში ჩემი უახლოესი მეგობრის ან ოჯახის წევრის ფუნქცია უნდა დაგაკისროთ. "სარკე" ისედაც არის ჩემი ოჯახის წევრი, წლებია, ჩემს სახლში ყოველ ოთხშაბათს შემოდის, მაგრამ მასთან საუბარი არასოდეს გამიბამს. ახლა კი დამჭირდით და მოგმართავთ.
ჩემი ქმარი არაჩვეულებრივი ადამიანია. ის ტიპური ქართველი მამაკაცია, უყვარს ძმაკაცები, ქეიფი, დარდიმანდული მოლხენა. ქალებთან არის ძალიან გალანტური. კარგი ქმარი და მამაა. იცავს ქართულ ტრადიციებს და სძულს ყველაფერი, რაც მას ეწინააღმდეგება. იცავს მარხვას, იღებს ზიარებას. არ გეგონოთ, იდეალური მამაკაცი მყავს გვერდით. უარყოფითი თვისებებიც გააჩნია, რაც ხშირად ხდება ხოლმე ჩვენი კამათის მიზეზი. წლებია ერთად მოვდივართ, მოვახერხეთ, კარგი მეგობრებიც გავმხდარიყავით. მოკლედ, ჩვეულებრივი ქართული ოჯახი გვაქვს თავისი დადებითი თუ უარყოფითი მხარეებით.
ყველაფერი "ოდნოკლასნიკებით" დაიწყო. ჩემი მული უცხოეთში ცხოვრობს და მან მოგვთხოვა, კომპიუტერი გვეყიდა, ეს საიტიც გაგვეხსნა და "სკაიპიც". მასთან კომუნიკაცია ამან ძალიან იოლი გახადა. ჩემი ქმარი იჯდა და ხან დასთან ლაპარაკობდა, ხან ფოტოებს ათვალიერებდა. მერე იმ საიტით ძველისძველი ნაცნობ–მეგობრები ამოქექა, კლასელები გაიხსენა – "უი, ეს როგორ შეცვლილა, უი, ამას რა კარგი ცოლი ჰყოლია"... მოკლედ, ვირტუალურ სამყაროში ჩაეფლო. "ფეისბუქმა" კი საერთოდ გადარია. უამრავი ადამიანი დაიმეგობრა, რომ იტყვიან, სულ შიგ ზის, ტელეფონშიც კი ჩართული აქვს, წერს და სწერენ, მიყვება, დღეს ეს გავიგე, თურმე ასე ყოფილა... ხშირად ვეხუმრებოდი, ტელეარხებმა შენ შესახებ რომ გაიგონ, ქმარს მომტაცებენ–მეთქი.
კომპიუტერთან მწყრალად არც მე ვარ, მაგრამ იშვიათად მცალია მისთვის. იმ დღესაც ოჯახის საქმეებს რომ მოვრჩი, კომპიუტერს მაშინ მივუჯექი. "ფეისბუქი" რომ გავხსენი, ვიღაც ქალის გვერდი ამოვარდა. შეიძლებოდა ავტომატურად ჩამეხურა კიდეც, ჩემი ყურადღება სექსუალურ ფოტოს რომ არ მიექცია. მოკლედ, ნეტა, არ მენახა! ჩემი ქმრის აღმოჩნდა. როგორც ჩანს, ანონიმური გვერდი აქვს გახსნილი, რომელიც ქალის სახელზეა დარეგისტრირებული. ვიღაც უცნობი, სექსუალური ქალის ფოტოები უდევს. მიმოწერაში რომ შევედი, თვალები კეფაზე მომექცა. ისეთი წერილები აქვს კაცებისთვის გაგზავნილი, გავოგნდი. ისინიც ისეთ პასუხებს სწერენ, გაგიჟდები! ამხელა ქალი ვარ და ლექსიკაში ეგეთი სიტყვები თუ არსებობდა, არც გამეგო.
ძალიან ცუდად გავხდი. ავდექი, წამლები დავლიე. ცოტა მოვღონიერდი და ისევ კომპიუტერს მივუჯექი. ჩემს თავს ვარწმუნებდი, ალბათ გეშლება–მეთქი, მაგრამ არა. ის "ქალი" ისეთ რაღაცეებს წერდა სტატუსებში თუ პირად მიმოწერაში, აშკარად ჩემი ქმარია. ამას წინათ ფასდაკლებით ძალიან კარგი კოსმეტიკა ვიყიდე. ის "ქალი" ზუსტად მაგას წერდა სტატუსში, ვაიმე, ისეთი კმაყოფილი ვარო და ჩემს სიტყვებს იმეორებდა. კიდევ ვნახე "ჩემეული" რაღაცეები...
ვიცი, თქვენს ჟურნალს უამრავი ადამიანი კითხულობს, მათ შორის – ფსიქოლოგებიც. კომპენტენტური ადამიანის აზრი მაინტერესებს. მითხარით, ჩემს ქმარს რა სჭირს! გეი არ არის, არ არსებობს, ამაში ვცდებოდე. იმაშიც დარწმუნებული ვარ, რომ ტრანსსექსუალი არ არის და არც ჩემს კაბებს იცვამს ჩუმ–ჩუმად. მაშინ გამაგებინეთ, რა სჭირს. რა ხდება მის ფსიქიკაში, რა პრობლემები აქვს? გთხოვთ, არ დაიზაროთ! ამის შესახებ ვერავის დაველაპარაკები, ვერც დას, ვერც დედას, მით უმეტეს, მეგობრებს. ერთადერთია "სარკე" ვისაც გული გადავუშალე. დახმარებას ვითხოვ! გამაგებინეთ, ჩემს ოჯახს რა სჭირს.
თქვენი ერთგული მკითხველი
